မိုးပုံပြင် (၁)

မိုးတွေရွာနေတဲ့ ဇွန်လတစ်လရဲ့ နေ့တစ်နေ့မှာ မွေးဖွားခဲ့လို့ အဖေနဲ့အမေက ကျွန်တော့်ကို မိုးစက်ဝင်း လို့ပေးခဲ့တာတဲ့။ အဲဒါကြောင့် မို့လား မသိပါဘူး။ မိုးနဲ့ ပတ်သက်ရင် ကျွန်တော့်ဘ၀မှာ အမှတ်တရတွေချည်းပါပဲ။ ဘ၀တစ်သက်တာလုံးအတွက် ရင်ထဲမှာ အမှတ် တရတွေချည်း ကျန်ခဲ့တဲ့ နေ့လေးတစ်နေ့ရှိပါတယ်။ အဲဒါကတော့ သူမကို စတင်တွေ့ရှိခဲ့တဲ့ နေ့လေးတစ်နေ့ပါ။ မှတ်မှတ်ရရ အဲဒီနေ့ လေးမှာလည်း မိုးတွေရွာနေတာပါပဲ။

ဇွန်လ တစ်ရက်နေ့ ၊
ဒီနေ့ ကျွန်တော် ကျောင်းစတက်ရတယ်။ ကျောင်းသားသစ် ကျွန်တော့် အတွက် အရာအားလုံးဟာ အသစ်အ ဆန်းတွေချည်းပါပဲ။ ကျောင်းလာအပ်ကတည်းက ဒေါ်ကြီးပြထားတဲ့ လမ်းအတိုင်း စက်ဘီးကလေး နင်းလာမိတယ်။ ကျောင်းဝင်းထဲ ကိုရောက်ရောက်ခြင်း ပတ်ဝန်းကျင် အသစ်ထဲကို ကျွန်တော် ရောက်ရှိသလို ခံစားရတယ်။ သူငယ်ချင်းမရှိ၊ အသိမိတ် ဆွေမရှိ။ နေသူရိန် ကျောင်းဆောင်ကြီးလို့ အများက သတ်မှတ်ကျတဲ့ ကျောင်းဆောင်ကြီးပေါ် ကျွန်တော်တက်လာမိတယ်။ ကျွန်တော်တက်ရမယ့်အခန်းက ဒသမတန်း(ခ)။ ဆရာမ ချပေးတဲ့နေရာလေးမှာ ၀င်ထိုင်ရင်း ကျွန်တော့်ဘေးနားက သူငယ်ချင်းတွေ နှစ်ယောက်ကိုကြည့်မိတယ်။ သူတို့တွေက ဒီကျောင်းရဲ့ ကျောင်းသားဟောင်းတွေပါ။ မျိုးဝင်း နဲ့ မင်းလှိုင်တဲ့။ ပထမဦးဆုံးနေ့မို့ထင်ပါ တယ်။ ဆရာမက အတန်းတက် နာမည်တွေကခေါ်ပြီး ကျောင်းသား၊ ကျောင်းသူတွေနဲ့ ရင်နှီးမှု ရယူပါတယ်။ ပြီးတာနဲ့ ဆရာမက ကျောင်းစည်းကမ်းတွေ၊ အခန်းတွင်းစည်းကမ်းတွေကို ပြောပြပါတယ်။ အဓိကကတော့ ကျောင်းဝတ်စုံတွေမှာ ကျောင်းအမှတ် ရင်ကပ်တံဆိပ်ကို မနက်ဖြန်မှာစပြီး တပ်ဆင်လာဖို့ ပြောပါတယ်။ ပြီးတာနဲ့ စာဆက်သင်တယ်။ သင်တဲ့ဘာသာရပ်က အင်္ဂလိပ်စာ ဘာသာရပ်။ ဆရာမရဲ့ အသင်အပြ ကောင်းမှုကြောင့်ထင်ပါရဲ့ ကျွန်တော်တို့တစ်တွေ စာသင်တဲ့ဆီမှာ စိတ်ဝင်စားနေလိုက်တာ ထမင်းစားခေါင်းလောင်းထိုးမှ စောစောက ငြိမ်သက်နေတဲ့ အခန်းဟာပြန်ပြီး ဆူညံအသက်ဝင်လာပါတယ်။ ကျွန်တော်က ပါလာတဲ့ ထမင်းချိုင့်လေးကို ကိုင်ပြီး အတန်းထဲမှာပဲ စားမလို့လုပ်နေတုန်း မျိုးဝင်းက သူတို့နဲ့အတူလိုက်စားဖို့ခေါ်တာနဲ့ ကျောင်းနားက လက်ဖက်ရည်ဆိုင်မှာ စားဖြစ်တယ်။ မျိုးဝင်း၊ မင်းလှိုင် နဲ့ ကျွန်တော်တို့ တစ်ယောက်နဲ့တစ်ယောက်မိတ်ဆက် ဖြစ်တယ်။ နယ်က လာတဲ့ ကျွန်တော့်လို ကျောင်းသားသစ် တစ်ယောက်အတွက် မျိုးဝင်းနဲ့ မင်းလှိုင် ဟာ ပထမဦးဆုံး အခင်ဆုံးသူငယ်ချင်းတွေပါပဲ။ ထမင်းစားပြီးတော့ ကျွန်တော်တို့ ၃ယောက် ကျောင်းခန်းထဲကို ပြန်ဝင်လာတယ်။ ညနေကျောင်းဆင်းချိန်မှာ သူငယ်ချင်းတွေနဲ့ နှုတ်ဆက်ပြီး စက်ဘီးထားရာကို လာခဲ့ပါတယ်။
အဲဒီမှာတင် ပြသနာတက်တော့တာပဲ။ မနက်က ကျွန်တော်ထားခဲ့တဲ့နေရာမှာ စက်ဘီးမရှိတော့ဘူး။ ကျောင်းသား တစ်ယောက်ကို မေးကြည့်တော့ အစ်ကိုကြီးစက်ဘီးကို သော့ခတ်ထားခဲ့လားတဲ့။ အဲဒီအချိန်ကျမှဘဲ စက်ဘီင်္းသော့ကို ရှာမိတယ်။ မတွေ့ဘူး။ မနက်က အတွေးတွေလွန်ပြီး သော့ခတ်ဖို့မေ့နေပြီ။ ညီလေးက ဆက်ပြောတယ်။ သော့ခတ်ဖို့ မေ့နေပြီဆိုရင်တော့ ဆရာဥာဏ်ကြီး နဲ့တွေ့ပြီတဲ့။ ပြောပြောဆိုဆိုနဲ့ထွက်သွားတယ်။ ကျွန်တော် ဟိုကြည့် ဒီကြည့်နဲ့ ဆရာဥာဏ်ကြီး ဆိုတာ ဘယ်သူလဲ၊ ဘယ်လိုပုံစံလဲ ပေါ့။ ပတ်ဝန်းကျင်ကို အကဲခတ်ကြည့်လိုက်တော့ ကျောင်းဆင်ဝင်အောက်နဲ့ မနီးမဝေးမှာ စက်ဘီး ၂ စီး ရပ်ထားတာတွေ့တယ်။ စက်ဘီးတွေ ဘေးနားမှာ တိုက်ပုံဝတ်ထားတဲ့ ဆရာတစ်ယောက်ကိုပါ တွေ့လိုက်ရတော့ ခုနက ညီလေး ပြောတဲ့ ဆရာဥာဏ်ကြီး ဆိုတာဖြစ်မှာပေါ့ဆိုတဲ့ အတွေးနဲ့ လျှောက်သွားမိတယ်။ သူ့ရှေ့ မှာလည်း ကောင်မလေးတစ်ယောက်ရပ်လို့။ လျှောက်သွားနေတုန်း သိပ် မကြာပါဘူး ဇွန်လရဲ့ ပထမရက်ပဲရှိသေးတယ်။ ကိုရွှေမိုးက ရွာပါလေရော။ ဆရာကြီးက ကျောင်းစည်းကမ်းထိန်းသိမ်းရေးကော်မတီ ဥက္ကဌကြီးတဲ့။ ဒီကျောင်းရှေ့ ကော်ရစ်တာမှာထားတဲ့ စက်ဘီးတွေထဲမှာ မင်းတို့နှစ်စီးပဲ သော့မခတ်တာ။ ကျောင်းဖွင့်တာ ပထမဦးဆုံးနေ့မို့လို့ မင်းတို့ကိုခွင့်လွှတ်လိုက်မယ်။ နောက်တစ်ခါ သော့မခတ်တဲ့ ဘီးတွေထဲမှာ မင်းတို့နှစ်ယောက်ရဲ့ စက်ဘီးတွေ ထပ်ပါလာရင်တော့ ဒါနဲ့တွေ့မယ် ဆိုပြီး လက်ထဲကကြိမ်လုံးကြီးကို ပြတယ်။ ပြီတော့ ချိန်းသော့ကြီးနဲ့ တွဲခတ်ထားတဲ့ ကျွန်တော့်တို့ စက်ဘီး ၂ စီးကိုဖွင့်ပေးလိုက်ပြီး ထွက်သွားပါတော့တယ်။ ကျွန်တော်က စက်ဘီးရရချင်းထွက်သွားမလို့ လွယ်အိတ်ထဲက ဒေါ်လေး ထည့် ပေးလိုက်တဲ့ ထီးကို ထုတ်လိုက်တယ်။ အဲဒီကျမှ ကျွန်တော့်ဘေးနာမှာ ရှိတဲ့ သူမကို ကြည့်လိုက်မိတယ်။ သူ့ကြည့်ရတာ မိုး ဒဏ်ကို ကာကွယ်ဖို့ ဘာမှမပါဘူးထင်တယ်။ ချက်ခြင်းပဲ သူ့ကို ကျွန်တော့်ထီးလေးကို ပေးမိတယ်။ ဒီမှာ ထီးမပါဘူးဆိုလည်း ငါ့ထီး ကို ယူသွားပါလား။ ငါက ဘယ်မှသွားစရာမရှိဘူး။ အိမ်တန်းပြန်မှာ။ တော်ကြာ နင် ကျူရှင်တွေ ဘာတွေ သွားစရာရှိရင် နောက်ကျ နေမယ်။ မိုးကလည်း တော်တော်နဲ့ တိတ်သေးမှာ မဟုတ်ဘူး။ အားမနာပါနဲ့ ဟာ ယူသွားပါ။ ငါက မိုးတိတ်အောင် စောင့်ပြီးမှ ပြန် လိုက်မယ်။ သူ ကျွန်တော့်ကို စကားတစ်ခွန်းပဲ ပြန်ပြောတယ်။ ကျေးဇူးဘဲ တဲ့။ သူ စက်ဘီးလေးနင်းပြီး ထွက်သွားတာကို ကြည့်ရင်း ကျွန်တော် စိတ်ထဲမှာ တစ်မျိုးလေး ခံစားရတယ်။ တစ်ခုခုတော့ တစ်ခုခုပဲဗျာ။ ကျွန်တော် မပြောတတ်ဘူး။ မိုးရွာကြီးထဲမှာ စက်ဘီး နင်းပြီး အိမ်ကို ပြန်လာခဲ့တယ်။ အဲဒီအချိန်ကစပြီး သူ့ကို ကျွန်တော့် သတိထားမိခဲ့သလို၊ စိတ်ထဲမှာလဲ မှတ်မှတ်ရရ ရှိခဲ့ပါတယ်။

ဆက်ရန်.... မကြာမီ.....လာမည် ..... မျှော် ...

မိုးစက်

24 . 7 . 2007 ( AM 1:46 )